Feminíssimas en Ribadavia

O Venres 26 de marzo, ás 20:30h, no Auditorio Casa da Cultura de Ribadavia terá lugar a cita coa peza de teatro para adultos Feminíssimas. Ademáis o evento conta coa colaboración da Rede de Auditorios da Deputación de Ourense e do Concello de Ribadavia.

A compañía DE STE XEITO PRODUCIÓNS presenta a súa obra composta por Esther F.Carrodeguas, dirixida por Xavier Castiñeira e interpretada por Stephy Llaryora, Esther F.Carrodeguas e Noelia Blanco.

Un Congreso Feminista na cidade de Vigo. Tres amigas da adolescencia que fai anos que non se ven. Tres amigas que teñen 3 maneiras ben distintas de entender o “feminismo”… Por exemplo: feminismo radical, feminismo liberal e teoría queer.
Esta é a base de Feminíssimas, unha peza con altas doses de humor, ironía e complicidade para poñer a amizade a proba mentres analizamos -dende a comedia- de que maneira as mulleres estamos a con-vivir neste novo mundo feminista no que nos atopamos mergulladas.

Unha maneira –tamén- de rirnos de nós mesmas, das nosas propias incongruencias e sobre todo do espazo que separa a teoría pura da práctica diaria. Un espazo –ademáis- para reflexionar sobre a amizade e a súa complexa relación coa ideoloxía.

En resumo: unha comedia negra… moi violeta.